Գերմանիայի ավարտված առաջնությունն այս անգամ բավական հետաքրքիր ստացվեց: Ի տարբերություն նախորդ մրցաշրջանների, այս անգամ չեմպիոնության համար պայքարը շատ թեժ ստացվեց: Մեծ մրցակցության պայմաններում, ի վերջո, կրկին չեմպիոն դարձավ «Բավարիան»: Երկար ժամանակ մրցաշարային աղյուսակը գլխավորող «Բորուսիան» մնաց երկրորդը: «Լայպցիգը» 3-րդն էր, իսկ Լևերկուզենի «Բայերը» եզրափակեց լավագույն քառյակը: Այս 4 թիմերն ավտոմատ կերպով ապահովեցին իրենց տեղը Չեմպիոնների լիգայի հաջորդ խաղարկության խմբային փուլում:
Եվրագավաթային, մասնավորապես՝ Եվրոպա լիգայի խմբային փուլի ուղեգիր նվաճեցին նաև Մյունխենգլադբախի «Բորուսիան» և «Վոլֆսբուրգը», իսկ «Այնթրախտը» կխաղա մրցաշարի որակավորման փուլում:
Բունդեսլիգան լքում են «Հանովերն» ու «Նյուրնբերգը», իսկ «Շտուտգարտը» փլեյ-օֆֆ փուլում կպայքարի «Ունիոն Բեռլինի» հետ իր տեղը պահպանելու համար: 2-րդ Բունդեսլիգայից բարձրացան «Քյոլնն» ու «Պադերբորնը»:
Բունդեսլիգայի լավագույն ռմբարկու դարձավ Ռոբերտ Լևանդովսկին: Լեհ ֆուտբոլիստը հասնում է այդ նվաճմանն իր կարիերայում 4-րդ անգամ:
Գերմանիայի առաջնության ավարտված խաղարկությունում ամենաշատ գոլային փոխանցումը կատարել է Դորտմունդի «Բորուսիայի» տաղանդավոր ֆուտբոլիստ Ջեդոն Սանչոն: Անգլիացին կատարել է 14 գոլային փոխանցում:
Բունդեսլիգայի «Ոսկե ձեռնոցը» նվաճեց «Լայպցիգի» դարպասապահ Պետեր Գուլաչին, որին հաջողվել է 16 խաղում սեփական դարպասն անառիկ պահել:
