VBET Հայաստանի գավաթի 31-րդ խաղարկության քառորդ եզրափակիչ 4 հանդիպումներից հետո հայտնի դարձան կիսաեզրափակչի մասնակիցները: Պատվավոր մրցանակի համար պայքարը շարունակում են «Ուրարտուն», «Վանը», «Նորավանքը» և գործող գավաթակիր «Արարատը»:
Հանդիպումների ամենաուշագրավ իրադարձությունները ներկայացնում ենք 10 փաստի տեսքով:
1. Քառորդ եզրափակիչ հանդիպումներն անցան դաշտի տերերի առավելությամբ, որոնք տոնեցին 3 հաղթանակ, մեկ խաղ ավարտեցին ոչ-ոքի: Գավաթի ընթացիկ խաղարկությունում կայացած 8 հանդիպումներում դաշտի տերերն ու հյուրերը 3-ական հաղթանակ են տոնել, 2 խաղում ոչ-ոքի է գրանցվել, խփվել է 19 գոլ:
2. «Ուրարտուն» հերթական անգամ VBET Հայաստանի գավաթի կիսաեզրափակչի ուղեգիր նվաճեց՝ 2-0 հաշվով պարտության մատնելով «Ալաշկերտին»: Հայաստանի գավաթի վերջին 9 խաղարկություններից միայն մեկում՝ 2020/21թթ. մրցաշարում «Ուրարտուին» չի հաջողվել հաղթահարել քառորդ եզրափակչի արգելքը՝ երկու խաղերի ընդհանուր արդյունքով զիջելով «Նոային» (0-2, 2-2): Իսկ լավագույն արդյունքն այդ ընթացքում «Ուրարտուն» ցույց է տվել 2015/16թթ. մրցաշարում՝ առայժմ վերջին՝ 3-րդ անգամ նվաճելով պատվավոր մրցանակը:
Պաշտոնական 2-րդ անընդմեջ խաղում Ջոնել Դեսիրեն դաշտից չհեռացավ առանց գոլի՝ բացելով հանդիպման հաշիվը: Դա գավաթի մրցաշարերում Դեսիրեի 2-րդ գոլն էր: Պաշտոնական մրցումներում նրա հաշվին արդեն 42 գոլ է գրանցված:
3. VBET Հայաստանի գավաթի ընթացիկ խաղարկությունը հոբելյանական էր «Ալաշկերտի» համար: 10-րդ անգամ մասնակցելով գավաթի մրցաշարերին, «Ալաշկերտը» 5-րդ անգամ չկարողացավ հաղթահարել քառորդ եզրափակչի արգելքը:
4. «Վանը» գավաթի ընթացիկ խաղարկության 2-րդ խաղում էլ մրցակցին հաղթեց հետխաղյա 11մ հարվածների շնորհիվ: Եթե գավաթի 1/8 եզրափակչում «Սևանի» հետ խաղում թիմի հաջողությունն ապահովել էր Նիկոլայ Ցիգանը՝ հետ մղելով հետխաղյա 3 11մ հարված, ապա «Փյունիկի» հետ մրցավեճում աչքի ընկավ թիմի մյուս դարպասապահ Արման Մելիքսեթյանը: Նա նախ խաղի հիմնական ժամանակում հետ մղեց Գևորգ Ղազարյանի 11մ հարվածը, ապա հետխաղյա 11մ հարվածների ժամանակ հաղթող դուրս եկավ Խոսե Կառաբալլոյի և Խոսե Բալզա Լիսկանոյի հետ մենամարտերում:
3-րդ անգամ մասնակցելով VBET Հայաստանի գավաթի խաղարկությանը, «Վանն» իր պատմության մեջ առաջին անգամ կիսաեզրափակչի ուղեգիր նվաճեց:
5. VBET Հայաստանի գավաթի ընթացիկ խաղարկությունում էլ «Փյունիկին» չհաջողվեց հաղթահարել քառորդ եզրափակչի արգելքը՝ հետխաղյա 11մ հարվածներով զիջելով «Վանին»: «Փյունիկը» գավաթի մրցաշարերում 100-րդ գոլը բաց թողեց:
Գավաթի նախորդ 4 խաղարկություններում «Փյունիկը» պայքարից դուրս էր մնացել առաջին փուլից (2017/18թթ. «Բանանց»՝ 0-0, 2-4, 2018/19թթ. «Լոռի»՝ 0-2, 1-1, 2019/20թթ. «Ուրարտու»՝ 0-0, 3-5՝ 11մ, 2020/21թթ. «Ուրարտու»՝ 1-2, 0-0):
Գավաթի վերջին 5 խաղարկություններում անցկացրած 9 հանդիպումներում փյունիկցիներն ընդամենը մեկ հաղթանակ են տոնել, 5 խաղ ավարտել են ոչ-ոքի, կրել են 3 պարտություն, խփել են ընդամենը 7 գոլ, սեփական դարպասը բաց են թողել 11 գնդակ:
