Կապանը չի մնալու առանց ֆուտբոլի: Հուլիսի 15-ին հայտնի դարձավ, որ «Գանձասարը» մասնակցելու է Հայաստանի Առաջին խմբի առաջնությանը: Չնայած կապանյան ակումբը Առաջին խմբի առաջնությանը մասնակցելու համար չուներ ազգային արտոնագիր և ուշացումով էր ներկայացրել հավաստագիրը, Հայաստանի ֆուտբոլի ֆեդերացիան միջնորդությամբ դիմել էր ՀՖՖ Գործադիր կոմիտեի անդամներին՝ առաջարկելով ընդառաջել «Գանձասար» ՖԱ ՀԿ-ին Առաջին խմբի առաջնությանը մասնակցելու հարցում: Գործկոմը կողմ էր քվեարկել խնդրանքը և մենք այժմ Առաջին խմբում ունենք 8 թիմ:
Կարևոր է ընդգծել, որ «Գանձասարը» դա նույն «Գանձասար-Կապանը», որը 2020-ի աշնանը դուրս եկավ VBET Հայաստանի Պրեմիեր լիգայից, այլ ուրիշ ակումբ: «Գանձասար-կապանը» 2015 թվականին դարձել էր հենց «Գանձասարի» իրավահաջորդը, սակայն վերջինը չի դադարել գոյությունը և կենտրոնացել է մանկապատանեկան ֆուտբոլի վրա:
VNews.am-ը զրուցեց «Գանձասարի» գործադիր տնօրեն Վլադիկ Առաքելյանի հետ, որը հայտնեց, թե ինչու է որոշել ակումբը հայտավորել Առաջին խմբին և ովքեր են խաղալու թիմում:
Ինչպե՞ս որոշեցիք Առաջին խմբի հայտ ներկայացնել :
Նոր մրցաշրջանից առաջ սպասում էինք, որ «Գանձասար-Կապանը» հայտ կներկայացնի, սակայն դա տեղի չունեցավ: Մենք էլ ստիպված որոշեցինք Առաջին խմբի հայտ ներկայացնել, որովհետև ամոթ կլիներ. Կապանը պետք է ֆուտբոլ ունենա:
Հայտնի է, որ խաղալու եք Կապանի «Քաղաքային» մարզադաշտում…
Այո, դա այն նույն ստադիոնն է, որի մասին Գանձասար-Կապանն ասում էր՝ ՖԻՖԱ-ն, ՈւԵՖԱ-ն, ՀՖՖ-ն չեն թողնում խաղեր անցկացնել:
Մեր ընտրանին
«Չենք եկել ներկա ստանալու համար». VBET Պրեմիեր լիգայի անակնկալ նորեկը
VBET Պրեմիեր լիգայում նոր ակումբ կա. Ինչպիսի թիմ է կառուցում Արմեն Շահգելդյանը
Ինչպես փոխարինել Մելենդեսին. Նազարյանը՝ ամենակարող դառնալու ճանապարհին
Հուլիսի 21-ին ֆեդերացիան այդ մարզադաշտում ստուգում կանցկացնի: (խմբ. – ՀՖՖ-ն հայտարարել է, որ տնային խաղերը կանցկացվեն այդ մարզադաշտում)
Ինչպե՞ս համաձայնության եկաք՝ այդ մարզադաշտում հանդիպումներն անցկացնելու շուրջ:
Ես միշտ էլ կարողանում եմ պայմանավորվել: Կապանում հարց չկա, որ ես ցանկանամ և չկարողանամ լուծել: Բայց այդ դեպքում խնդիրը ստադիոնը չէր, այլ ցանկությունը:
Դո՞ւք եք ֆինանսավորելու ակումբը:
Հիմնականում ես և իմ ընկերները: Մի քիչ պետական կառույցներն էլ կօգնեն: Առաջին լիգայի համար գումարը կբավարարի:
«Գանձասարը» մի քանի տարի է տնօրինում է Երևանի Շենգավիթի մարզադպրոցը: Այդ մարզադպրոցի սաներո՞վ եք կազմավորելու Առաջին խմբի թիմը:
Ոչ, հիմնականում կլինեն կապանցիներ: Շենգավիթում մենք տարբեր տարիքային 11 թիմ ունենք, բայց «Գանձասարում» ընդգրկվելու են կապանցիներ, որոնք բանակային զինծառայությունից հետո առանց ֆուտբոլի են մնացել: Նրանք ամբողջ կյանքը ֆուտբոլ են պարապում, հետո ծառայում հայրենիքին, վերադառնում, բայց թիմ չկա, որ շարունակեն ֆուտբոլով զբաղվել:
Լեգեոներներ չե՞ք հրավիրելու:
Ընթացքում կտեսնենք: Եթե հարմար տարբերակ լինի, կհրավիրենք:
Ո՞վ է լինելու «Գանձասարի» մարզիչը:
Վաղն է որոշվելու: Հիմնականում լինելու են տեղացիներ, բայց հավանաբար երևանից կհրավիրենք մեկ մասնագետի, ով ՊՐՈ կարգի արտոնագիր և աշխատանքային փորձ ունի:
Ի՞նչ խնդիր է դրվելու թիմի առջև:
Առաջին տարում ամրապնդել դիրքերը, իսկ հետո ժամանակը ցույց կտա:
Եթե թիմը VBET Հայաստանի Պրեմիեր լիգայի ուղեգիր նվաճի, ի՞նչ եք անելու:
Եթե նվաճենք, կխաղանք: Միգուցե, այդ դեպքում լավ հովանավորներ ի հայտ գան, օգնեն: Առայժմ առաջնային է, որ մեր սահմանամերձ գոտում ֆուտբոլի թիմ լինի:
