Ղազախստանի Նուրսուլթան քաղաքում մեկնարկած ըմբշամարտի աշխարհի առաջնությունում սեպտեմբերի 15-ին պայքարի մեջ մտան հունահռոմեական ոճի ըմբիշները 3 քաշային կարգերում՝ սկսելով օլիմպիական վարկանիշների խաղարկությունը:
Մինչև 97 կգ քաշային կարգում Արթուր Ալեքսանյանը 1/8 եզրափակչում հանդիպեց իր սկզբունքային մրցակիցներից մեկին՝ թուրք Չենկ Իլդեմին: Լարված գոտեմարտում Ալեքսանյանը հաղթանակ տարավ ու դուրս եկավ 1/4 եզրափակիչ:
1/4 եզրափակչում Ալեքսանյանը մրցեց իրանցի Հադի Սարավիի հետ ու պարտության մատնեց նրան՝ դուրս գալով կիսաեզրափակիչ: Այնտեղ հայ ըմբիշի մրցակիցն է վրացի Գեորգի Մելիան: Կիսաեզրափակիչ դուրս գալով՝ Ալեքսանյանը նաև առաջին օլիմպիական ուղեգիրը նվաճեց Հայաստանի համար:
Մինչև 67 կգ քաշային կարգում Կարեն Ասլանյանը 1/8 եզրափակչում մրցավարների տված զգուշացման արդյունքում զիջեց եգիպտացի Մոհամեդ Էլսայեդին: Նա կկարողանա պայքարել բրոնզի համար, եթե մրցակիցը դուրս գա եզրափակիչ:
Այսօր մեկնարկած մեր մյուս ըմբիշը՝ մինչև 87 կգ քաշային Արթուր Շահինյանը դուրս մնաց պայքարից հենց առաջին փուլում:
Հիշեցնենք, որ վերոնշյալ քաշային կարգերում իրենց երկրների համար Օլիմպիական խաղերի ուղեգրեր են նվաճում առաջին 6 տեղերը գրաված մարզիկները:
Երեկ պայքարի մեջ մտած մեր ըմբիշներից Մալխաս Ամոյանը սփոփիչ գոտեմարտի վերջում ձեռքից բաց թողեց հաղթանակը՝ զրկվելով մեդալի համար պայքարի հնարավորությունից: Սլավիկ Գալստյանը պայքարելու է բրոնզե մեդալների համար, նրա մրցակիցը Մեյսամ Դալխանին է Իրանից:
Արթուր Ալեքսանյանի կիսաեզրափակիչը և Սլավիկ Գալստյանի՝ երրորդ տեղի համար գոտեմարտերը կսկսվեն Երևանի ժամանակով 16:00-ից:
Ըմբշամարտի աշխարհի առաջնության բոլոր նորությունները, գոտեմարտերի տեսագրություններն ու բացառիկ հարցազրույցները կարող եք գտնել Vivaro News – Armenian Sport էջում:
