Ցանկացած ակումբի վրա մեծ հետևանք կարող է թողնել երկու անգամ չեմպիոնությունը ձեռքից բաց թողնելը: Ակումբի հաջորդ քայլը պետք է դառնա քայլ առաջ կատարելը, չեմպիոնական թիմ ստեղծելը կամ հիասթափվելն ու այլ մոտեցում փնտրելը: Երևանի «Նոան» չնայած նրան, որ 2 տարվա պատմություն ունի, արդեն տպավորիչ նվաճումների է հասել՝ դարձել է գավաթակիր և մասնակցել եվրագավաթներին:
VNews.am-ի հետ զրույցում «Նոայի» գործադիր տնօրեն Արթուր Սահակյանը հայտնեց, թե ինչ խնդիրներ են դրվել հաջորդ մրցաշրջանի համար, ինչո՞ւ բաժանվեցին գլխավոր մարզչից ու առաջատար ֆուտբոլիստից, և ո՞րն է աստղային տրանսֆերային առաջին նպատակը:
Դուք Հայաստանի հավաքականի հետ Շվեդիայում էիք: Թիմն ինչպե՞ս ընդունեց պարտությունը:
Ցանկացած պարտություն ցավալի է, անկախ նրանից, թե թիմն ինչ կազմով է խաղում: Տղաները փորձեցին մինչև վերջ խաղալ և հնարավորինս հետ բերել կորցրածը, բայց՝ չստացվեց: Իհարկե, ֆուտբոլիստները գոհ չէին արդյունքից, բայց նրանք հասկանում են, որ այս ամենն արվում է նրա համար, որ նրանք հավուր պատշաճի մոտենան սեպտեմբերին կայանալիք ընտրական փուլի հանդիպումներին:
Երբ հայտնի դարձավ, որ Հայաստանի հավաքականն ընկերական խաղեր է անցկացնելու Խորվաթիայի ու Շվեդիայի պես ուժեղ մրցակիցների հետ, մտավախություն կար, որ հնարավոր պարտության պատճառով թիմը կարող է կորցնել այն վստահությունը, որ մինչև այդ ձեռք է բերել: Դուք նման բան չտեսա՞ք հավաքականի մոտ:
Մեր հավաքականի տղաների մոտ այնպիսի հոգեբանական գործոն կա, որ մեծ նշանակություն ունի: Եթե ուշադիր եք եղել, նրանք նախկինում գոլ բաց թողնելուց հետո կոտրվում էին, իսկ հիմա կարողանում են պատասխան գոլը խփել: Նրանց մեջ մտել է հաղթողի հոգեբանություն, նրանք չեն կարողանում հանձնվել: Գարնանը գրանցված հաղթանակները ցույց տվեցին, որ տղաների մոտ կա հավատ սեփական ուժերի նկատմամբ:
«Նոայից» Հայաստանի հավաքական էր հրավիրվել և այդ հանդիպումներին մասնակցել աջ պաշտպան Ժոաո Մոնրո Արարատը: Գո՞հ եք նրա ելույթներից:
Մեզ բավականին գոհացրեց նրա խաղը: Իհարկե, կան նաև թերություններ, բայց այն ամեն, ինչ տեսնում ենք նրա եկած օրվանից մինչև այսօր, խոսում է նրա արագ ընթացող առաջընթացի մասին:
Ձեզ չզարմացրե՞ց, որ «Նոայի» մեկ այլ ֆուտբոլիստ՝ Պետրոս Ավետիսյանը չհիրավիրվեց ազգային հավաքական, չնայած նրան, որ ճանաչվել է VBET Պրեմիեր լիգայի մայիս ամսվա լավագույն ֆուտբոլիստ:
Ճիշտն ասած՝ սպասում էի, որ Պետրոսին կհրավիրեն հավաքական: «Նոային» միանալուց հետո նա (չեմ վախենա այդ խոսքից) դարձել է թիմի առաջատարը: Նրա օգտակար գործողությունների շնորհիվ մենք բավականին շատ միավորներ վաստակեցինք: Բայց հավաքական հրավիրելու որոշումը մարզիչն է կայացնում, ինչի վրա մենք չենք կարող ազդել:
Երկու տարի անընդմեջ VBET Պրեմիեր լիգայում թիմը գրավում է երկրորդ տեղը: Երկու տարի առաջ նման հնարավոր արդյունքները հաջողություն կհամարեի՞ք: Նորաստեղծ ակումբների համար հաջողություն կհամարվեր այսպիսի բարդ առաջնությունում երկու անգամ երկրորդ տեղը գրավելը, բայց երբ վերջին տուրից առաջ չեմպիոնության շանսեր են լինում, բայց տիտղոսը չես նվաճում, դա հիասթափություն է դառնում: Ընդհանուր առմամբ՝ մրցաշրջանը հաջողված էր մեզ համար:
Նախորդ մեր զրույցի ժամանակ ասացիք, որ չեմպիոն չդառնալու պատճառով «Նոայի» քաղաքականությունում հնարավոր է փոփոխություններ լինեն: Այդ հարցով արդեն հստակություն կա՞:
Գլոբալ առումով ոչինչ չի փոխվի: Արդեն կփորձենք ընտրել այնպիսի հայ ֆուտբոլիստների, որոնք մեծ դերակատարում կունենան, այլ ոչ թե խաղադաշտում հայ ֆուտբոլիստների թիվը կլրացնեն: Այնուհետև, կընտրենք մեր հնարավորությունների սահմաններում որակյալ լեգեոներներ: Այս տարի կենտրոնանալու ենք նաև ակադեմիայի վրա:
ՀՖՖ-ն Վաղարշապատի ակադեմիան վարձակալությամբ «Նոային» է տվել: Ինչպե՞ս են ընթանում աշխատանքները նոր պայմաններում:
Վաղարշապատի ակադեմիայից 8 թիմ մասնակցում է Հայաստանի առաջնություններին, իսկ հաջորդ մրցաշրջանից կավելացնենք ևս 2-ով: Նաև ունենք 7 թիմեր, որոնք չեն մասնակցում առաջնություններին: Մեր գլխավոր թիմն արդեն 3 ամիս է, մարզվում է Վաղարշապատում, բայց այնտեղ չենք կարող պաշտոնական խաղեր անցկացնել, որովհետև մարզադաշտը դեռ պատրաստ չէ:
Հաջորդ մրցաշրջանում նույնպես տնային հանդիպումներն անցկացնելո՞ւ եք Ավանի ակադեմիայում:
Կարծում եմ՝ այո:
«Նոայից» հեռացավ գլխավոր մարզիչ Դմիտրի Գունկոն: Ի՞նչն էր պատճառը, որ նա չմնաց ակումբում:
Դա ակումբի ու մարզչի համատեղ որոշումն էր: Ես իմ և ակումբի անունից ցանկանում եմ շնորհակալություն հայտնել Գունկոյին կատարած մեծ աշխատանքի համար: Նա «Նոային» միացավ, երբ արցախյան պատերազմն էր ընթանում և թիմի վիճակը, մեղմ ասած, լավ չէր: Փառք ու պատիվ նրան և մյուս անձնակազմին, որ կարողացանք հասնել արդյունքի:
Ըստ տեղեկությունների՝ Գունկոն հնարավոր է գլխավորի «Արարատ-Արմենիան»: Ինչպե՞ս եք վերաբերվում այդ լուրին:
Եթե պաշտոնապես նման տեղափոխություն լինի, ապա ես միայն ամենալավն եմ մաղթելու Գոնկոյին և «Արարատ-Արմենիային»:
«Նոայի» նոր մարզչի հարցում որևէ հստակություն կա՞:
Տարբերակներ կան, բայց հստակություն դեռ չկա:
Կրկին արտասահմանցի մասնագետի եք հրավիրելո՞ւ:
Պարտադիր չէ: Նաև հայ մարզիչների թեկնածություններ ենք քննարկում:
Մեր ընտրանին
-
2 տարի բանակում՝ առանց ֆուտբոլի, իսկ հետո՝ Կապառոսից հրավեր ազգային հավաքական․ Յուրի Գարեգինյանի ուշագրավ ճանապարհը
-
Թարմ մտքեր ու գրավիչ թիմ տրանսֆերային շուկայում. Ինչու է Զայցևը եկել Հայաստան
-
Մելենդեսի ծրագրի հետևորդները. Ինչպես «Շիրակի» ակադեմիան սկսեց թրենդ թելադրել Հայաստանում
«Նոան» արդեն մեկ խոշոր տրանսֆեր կատարեց՝ հրավիրելով Ալեքսանդր Կարապետյանին: Ի՞նչ եք ակնկալում այդ տեղափոխությունից:
Նրա նման որակյալ ֆուտբոլիստը շատ կարևոր է թիմի ներսում, որովհետև մեր ակումբում հիմնականում երիտասարդ խաղացողներ են: Նա պրոֆեսիոնալ է, ունի գոլ խփելու կարողություն և ինչու ոչ՝ մյուս հարձակվողների համար սա մրցակցություն է, քանի որ ոչ ոքի տեղը մեկնարկային կազմում ապահոված չէ:
Ձեր թիմից հեռացավ նաև մյուս առաջատար խաղացողը՝ Վլադիմիր Ազարովը: Ինչո՞ւ նա հեռացավ:
Ավարտվել էր Ազարովի պայմանագրի ժամկետը և նա ցանկություն հայտնեց տեղափոխվել այլ ակումբ:
Ազարովը տեղափոխվեց «Ակրոն», որտեղ վարձակալությամբ խաղում է Մաքսիմ Մայրովիչը: Նրա ապագայի հարցում որոշում կայացրե՞լ եք:
Մաքսիմի վարձակալության ժամկետը սպառվում է և նա վերադառնալու է «Նոա»: Միայն դրանից հետո կորոշենք նրա ապագան:
Շատ են խոսակցությունները նաև Պետրոս Ավետիսյանի մասին: Նա կմնա՞ թիմում:
Եթե արտասահմանից լավ առաջարկ հետևի, Պետրոսը կարող է հեռանալ «Նոայից»:
Վերջին տարիներին «Նոա Հոլդինգը» ծրագրում էր արտասահմանյան երեք ակումբ ընդգրկել իր կազմում՝ իտալական «Սիենան», գերմանական «Յուրդինգենը» և լատվիական «Յուրմալան»: Այժմ «Յուրամալան» և «Յուրդինգենն» արդեն պաշտոնապես «Նոա Հոլդինգի» կազմում չեն: Իսկ «Սիենայի» հարցում փոփոխություն լինելո՞ւ է:
Ես կցանկանայի խոսել միայն Երևանի «Նոայի» մասին:
Վերջին հարցը: Հաջորդ մրցաշրջանում ի՞նչ խնդիրներ են դրվելու «Նոայի» առջև:
Դառնալ VBET Պրեմիեր լիգայի չեմպիոն և դուրս գալ Կոնֆերենցիաների լիգայի խմբային փուլ:
Հայաստանի հավաքականի վերջին նորությունները