«Մանչեսթեր Յունայթեդը» դա Ալքես Ֆերգյուսոնն է, իսկ Ալեքս Ֆերգյուսոնը դա «Մանչեսթեր Յունայթեդն» է: Շոտլանդացին այնքան մեծ հետք է թողել այդ ակումբի պատմության մեջ, որ նրա ձեռագիրը երևում է նույնիսկ տրանսֆերներում: Վերջին 20 տարում «Յունայթեդը» մյուս շատ գրանդ ակումբներից տարբերվում էր կազմի կայունությամբ: Շոտլանդացին նախընտրում էր մեկ տարում ընդամենը 2-3 գործարք կատարել, բայց պայմանով, որ հնարավոր նորեկը պարտադիր պետք է բարձրակարգ լինի և օգուտ տա թիմին: Այդ դեպքում էական չէր, թե որքան մեծ կլինի գումարային փոխհատուցումը: Ֆերգյուսոնի տրանսֆերային քաղաքականությունը մասամբ պահպանվեց նաև նրա հեռանալուց հետո և դարձավ մի քանի հիանալի գործարքների բանալին: Այդուհանդերձ, 21-րդ դարում «Մանչեսթեր Յունայթեդի» լավագույն տրանսֆերների մեծ մասը գրանցվել են հենց սըր Ալեքսի օրոք:
VNews.am-ը շարունակում է 21-րդ դարում տարբեր ակումբների լավագույն տրանսֆերների շարքը (միայն նորեկների մասով): Այժմ հերթը «կարմիր սատանաներինն» է:
10. Պատրիս Էվրա՝ «Մոնակոյից». 8 մլն եվրո (2006 թվական)
«Մոնակոյում» անցկացրած 3,5 տարում Էվրան ապացուցեց, որ կարող է ավելի լուրջ թիմում խաղալ: Ֆրանսիացին «կարմրասպիտակների» հետ նույնիսկ հասավ Չեմպիոնների լիգայի եզրափակիչ, որում զիջեց Ժոզե Մոուրինյոյի «Պորտուին»: «Մանչեսթեր Յունայթեդ» տեղափոխությունը կայացավ 2006 թվականի հունվարին: Մինչև այդ Ֆերգյուսոնը չէր կարողանում այնպիսի ձախ պաշտպան գտնել, որը կբետոներ իր տեղը մեկնարկային կազմում: Էվրան ռեակտիվ արագություն ուներ, ճարպիկ էր, լավ էր հարձակվում և պաշտպանվում: Այդ ամենը նպաստեցին նրան, որ ֆրանսիացին 8 տարի անցկացրեց Օլդ Թրաֆորդում և նվաճեց 14 տիտղոս:
9. Մայքլ Քարիկ՝ «Տոտենհեմից». 27 մլն եվրո (2006 թվական)
Էվրայի տրանսֆերից կես տարի անց սըր Ալեքսը կատարեց իր երկրորդ հաջող գործարքը: Այն ժամանակ, «Տոտենհեմն» «հավերժ բարձունքին չհասած» ակումբ էր, բայց այնքան հարուստ չէր, որքան հիմա, ուստի ստիպված էր իր առանցքային խաղացողներին վաճառել գրանդներին: Քարիկն անմիջապես դարձավ «կարմիր սատանաների» մեկնարկային կազմի ֆուտբոլիստ, որը կարողանում էր կապել պաշտպանությունը և հարձակումը: Քարիկը 464 խաղ անցկացրեց ՄՅՈւ-ի մարզաշապիկով, ինչն ակումբի պատմության վեցերորդ ցուցանիշն է: Հաշվի առնելով, որ այժմ անգլիացին «Յունայթեդի» մարզչական շտաբում է, ապա եթե տարիներ անց ֆուտբոլիստ+մարզիչ վիճակագրությունը դառնա ակտուալ, նա ավելի բարձր նշանակություն կստանա ակումբի համար, քան այժմ է:
8. Դավիդ դե Խեա՝ «Ատլետիկոյից». 25 մլն եվրո (2011 թվական)
Ֆուտբոլում 10 տարին պատկառելի թիվ է, անկախ թե դա ինչին է վերաբերում: Իսկ եթե ֆուտբոլիստը 10 տարի անցկացրել է «Մանչեսթեր Յունայթեդի» պես հզոր ակումբում, ապա դա կրկնակի հիացմունքի առիթ է տալիս:
Դե Խեայի շուրջ իրավիճակը մի քանի տարին մեկ սրվում է: Նա սկզբում լուրջ խնդիրներ ուներ անգլիական ֆուտբոլին հարմարվելու, բարձրից անվերջանալի փոխանցումներին արձագանքելու և փորձառու պաշտպաններին հրահանգներ տալու հարցում: Հետո իսպանացին գտավ իր խաղը, բայց վրա հասավ «Ռեալը», փչացած ֆաքսը, և ամեն ինչ նորից սկսելու անհրաժեշտությունը: Սակայն դա դե Խեային ավելի ուժեղ դարձրեց և նա սկսեց իր կարիերայի ու միգուցե աշխարհի լավագույն խաղը ցուցադրել: Հետո եղավ ԱԱ-2018-ում ձախողումը, ռեկորդային աշխատավարձով պայմանագիրը և խաղային անկումը, ինչը բերեց մեկնարկային կազմից դուրս մնալուն: Հնարավոր է դե Խեայի օրերը հաշված են «Օլդ Թրաֆորդում», սակայն նա այս 10 տարում այնքան անգամ է փրկել ՄՅՈւ-ին, որ թիմի երկրպագուները միշտ երախտապարտ են լինելու և մեծ հարգանքով են հիշելու նրան:
7. Էդվին վան դեր Սար՝ «Ֆուլհեմից». 4 մլն եվրո (2005 թվական)
Հոլանդացի հանրահայտ դարպասապահը մինչև 31 տարեկանը խաղացել էր «Այաքսում» ու «Յուվենտուսում», այնուհետև տեղափոխվեց «Ֆուլհեմ»: Սովորաբար դա կարիերայի նահանջի ազդանշան է, բայց ոչ այս դեպքում: Վան դեր Սարը 34 տարեկանում տեղափոխվեց «Մանչեսթեր Յունայթեդ» և արտակարգ նվաճումների հասավ: Նրա հետ միասին «Յունայթեդը» 11 տիտղոս նվաճեց և 3 անգամ դուրս եկավ Չեմպիոնների լիգայի եզրափակիչ, որոնցից մեկում հաղթեց «Չելսիին»: 11-մետրանոց հարվածաշարում հենց հոլանդացին դարձավ հերոս՝ հետ մղելով Նիկոլա Անելկայի հարվածը:
6. Բրունու Ֆերնանդեշ՝ «Սպորտինգից». 55 մլն եվրո (2020 թվական)
Տրանսֆեր, որը դարձել է «նոր Մանչեսթեր Յունայթեդի» խորհրդանիշը: Պորտուգալացին հենց առաջին խաղից դարձավ թիմի առաջատարը: Նման բան դժվար է նույնիսկ պատկերացնել: Բրունուն սպասվածից երկար մնաց «Սպորտինգում», բայց դա օգնեց նրա կայացմանը: Կիսապաշպանն Անգլիա եկավ հասուն տարիքում և միանգամից սկսեց գերիշխել:
Մեր ընտրանին
Երբ առաջինը Ռոնալդուն չէ. 21-րդ դարում «Ռեալի» լավագույն 10 տրանսֆերները
Ներկայիս կազմից 2 ֆուտբոլիստ. 21-րդ դարում «Ինտերի» լավագույն 10 տրանսֆերները
«Ես ձեզ կբերեմ տիտղոսներ կամ սնանկություն». Պատմության ամենաանսպասելի տրանսֆերները
«Յունայթեդում» անցկացրած 1,5 տարում Ֆերնանդեշը 40 գոլ է խփել և 25 գոլային փոխանցում կատարել: Նման բարձր վիճակագրությամբ շատ ֆուտբոլիստներ չհայտնվեցին մեր թոփում, բայց Ֆերնանդեշի առավելությունն այն է, որ նա դեռ հնարավորություն ունի երկար տարիներ մնալ «Օլդ Թրաֆորդում»: Եթե ամեն ինչ այդպես լինի, տարիներ անց նմանատիպ թոփ կազմելիս Բրունուին հանգիստ կարող ենք պատկերացնել լավագույն եռյակում:
5. Ռիո Ֆերդինանդ՝ «Լիդսից». 46 մլն եվրո (2002 թվական)
Ֆուտբոլում թանկարժեք տրանսֆերը որոշելու համար բավական չէ նշել, թե տրանսֆերի գումարը որքան է կազմել: Հարկավոր է հաշվի առնել գնաճը: 1970 թվականին 10 մլն դոլարով կարելի էր ձեռք բերել աշխարհի լավագույն թիմերից մեկի ամբողջ մեկնարկային կազմը: Հիմա այդքան գումար գրանդները պահեստային դարպասապահի համար են ծախսում: Երբ մի օր բրիտանացի ֆինանսիստները որոշեցին տրանսֆերների չափսը որոշելու համար հաշվի առնել գնաճը, պարզվեց, որ Ռիո Ֆերդիդնանդի տեղափոխությունը «Մանչեսթեր Յունայթեդ» ամենախոշորներից մեկն է պատմության մեջ:
Այդ գործարքն արդարացնելու համար անգլիացուն հարկավոր էր փառահեղ խաղ ցուցադրել և նա արեց դա: Ֆերդինանդը 12 տարի «Յունայթեդին» դարձրեց աշխարհի ամենահուսալի պաշտպանություն ունեցող թիմերից մեկը՝ անցկացնելով 455 խաղ և նույնիսկ դառնալով ԱՊԼ-ի չեմպիոն:
4. Նեմանյա Վիդիչ՝ «Սպարտակից». 10,5 մլն եվրո (2006 թվական)
Երբ Ֆերդինանդի կողքին սկսեց խաղալ սերբը, ձևավորվեց 21-րդ դարի լավագույն կենտրոնական պաշտպանների զույգերից մեկը (միգուցե, լավագույնը): Սերբը 8 տարի անցկացրեց «Օլդ Թրաֆորդում» և գրեթե կրկնեց Ֆերդինանդի բոլոր հաջողությունները:
Իհարկե, Ռիոն ավելի մեծ ներդրում ունի թիմի հաջողություններում և ավելի երկարակյաց է, սակայն տրանսֆերի ավելի ցածր գնի պատճառով մեր թոփում Վիդիչը շրջանցեց նրան:
3. Ռուդ վան Նիստելռոյ՝ ՊՍՎ-ից. 28,5 մլն եվրո (2001 թվական)
Դարի սկզբում համաշխարհային ֆուտբոլը դեռ գտնվում էր պաշտպանողական խաղի ստվերի տակ, բայց արդեն սկսում էր «դեպի լույսը գնալ»: Թիմերը հազվադեպ էին փորձում համարձակ խաղալ և նախաձեռնողի դերը կատարել, ինչի հետևանքով գնդակի վերահսկումը հազվադեպ էր անցնում 55 տոկոսը: Ընդ որում՝ դա վերաբերում է նաև թոփ ակումբներին: Այդ խառը ժամանակներում «Մանչեսթեր Յունայթեդը» ձեռք բերեց ՊՍՎ-ի 25-ամյա հարձակվող Ռուդ վան Նիստելռոյին (հերթական օրինակը, թե որքան կարևոր է բոլոր կողմերին չշտապել տրանսֆերի հարցում): Հոլանդացին անմիջապես սկսեց այն տարիների համար անհավանական արդյունավետություն ցուցադրել: Նա 5 տարում 150 գոլ խփեց «կարմիր սատանաների» կազմում: Վան Նիստելռոյը 3 անգամ դարձավ Չեմպիոնների լիգայի լավագույն ռմբարկու, 1 անգամ էլ՝ Պրեմիեր լիգայի: Այդպես Ռուդի անունը դարձավ գոլի հոմանիշ:
2. Ուեյն Ռունի՝ «Էվերտոնից». 37 մլն եվրո (2004 թվական)
21-րդ դարում Անգլիայում շատ հրաշամանուկներ են եղել, բայց ոչ ոք այդքան մեծ աղմուկ չի առաջացրել, որքան Ուեյն Ռունին: Նա 17 տարեկանում Անգլիայի հավաքականի հետ մեկնեց Եվրոպայի առաջնության և դարձավ մրցաշարի գլխավոր բացահայտումներից մեկը: Ալեքս Ֆերգյուսոնը չէր կարող բաց թողնել այդ տաղանդին, այլապես նա կհավերժացներ այլ թիմերի մարզիչների անունները: Ամառային տրանսֆերային պատուհանի վերջին օրը Ռունին տեղափոխվեց Մանչեսթեր: Արդեն նրա նորամուտի խաղից բոլորը համոզվեցին, որ արժեր պատանու համար 37 մլն եվրո վճարել, որովհետև նա անմիջապես հեթ-տրիկի հեղինակ դարձավ:
Հետագան արդեն կանխատեսելի էր: Ռունին դարձավ «Մանչեսթեր Յունայթեդի» լավագույն ֆուտբոլիստներից մեկը, ընդ որում ժամանակի ընթացքում բացահայտվեց որպես խաղարկող: ՄՅՈւ-ի կազմում նա 16 տիտղոս նվաճեց: 559 խաղում Ռունին դարձավ 253 գոլի և 146 գոլային փոխանցման հեղինակ: Նա նաև շրջանցեց Բոբի Չառլտոնին՝ դառնալով «Յունայթեդի» պատմության լավագույն ռմբարկուն:
1. Կրիշտիանու Ռոնալդու՝ «Սպորտինգից». 19 մլն եվրո (2003 թվական)
Երբ Դևիդ Բեքհեմը բազմաթիվ սկանդալներից հետո տեղափոխվեց Մադրիդի «Ռեալ», «Յունայթեդի» երկրպագուներին հուզում էր երկու հարց. ով կկարողանա փոխարինել թիմի գլխավոր աստղին և ում կտան նրա 7 համարը: Երկու հարցի պատասխանը դարձավ Կրիշտիանու Ռոնալդուն: Սկզբնական շրջանում պորտուգալացու խաղը երկակի տպավորություն էր թողնում: Նա խելահեղ խաբքերի էր տիրապետում, շատ արագ էր, բայց թերանում էր գրոհների եզրափակման գործում և չարաշահում էր անհատական խաղը: Մեկ խոսքով՝ Ռոնալդուի արդյունավետությունը վիճելի էր: Ամեն ինչ փոխվեց 2006 թվականի Մունդիալից հետո: Կրիշտիանուն Անգլիա վերադարձավ կերպարանափոխված: Նա անմիջապես սկսեց ցուցադրել այն խաղը, որի շնորհիվ արագորեն դարձավ աշխարհի լավագույն ֆուտբոլիստը: Ռոնալդուն այլևս անիմաստ խաբքի չէր դիմում, այլ հենց առիթ էր ընձեռնվում, հարվածում էր: Նրա հարվածն անորսալի էր դարձել: Կրիշտիանուն գոլեր էր խփում բոլոր տարածություններից, երկու ոտքերով և գլխով: Արդեն 2006/07 մրցաշրջանում «Յունայթեդը» վերադարձրեց չեմպիոնի կոչումը, որից զրկված էր 2002 թվականից: Հաջորդ տարի Ռոնալդուն Չեմպիոնների լիգայի եզրափակիչում գոլ խփեց, ինչը թիմին օգնեց նվաճել պատվավոր տիտղոսը: Զուգահեռաբար նրանք պահպանեցին ԱՊԼ-ի չեմպիոնի կոչումը: Հաջորդ տարի կրկին Պրեմիեր լիգան նրանցն էր, բայց եղավ պարտություն Չեմպիոնների լիգայի եզրափակիչում: Նրանց ճանապարհին կանգնեց Գվարդիոլայի «Բարսելոնան», որի կազմում փայլում էր Լիոնել Մեսին: Ռոնալդուն որոշեց մեկնել Իսպանիա և անձամբ ձեռնոց նետել հանդուգն արգենտինացուն:
Երկար բանակցություններից հետո «Մանչեսթեր Յունայթեդը» 2009 թվականին համաձայնեց ռեկորդային 94 մլն եվրոյով վաճառել իր առաջատարին: Այդպես նա դարձավ ֆուտբոլիստ, որը հսկայական խաղային օգուտ տվեց անգլիական գրանդին, նրա կազմում դարձավ աշխարհում լավագույնը, իսկ հետո նաև ռեկորդային գումար բերեց ակումբի բյուջե:
