3-րդ մրցաշրջանն անընդմեջ Հայաստանի Բարձրագույն խմբի առաջնության լավագույն ռմբարկուի տիտղոսին արժանացավ այլազգի ֆուտբոլիստը: Այս անգամ «Ոսկե խաղակոշիկ» մրցանակի դափնեկիր դարձավ «Արարատ-Արմենիայի» նիգերիացի հարձակվող Յուսուֆ Օտուբանջոն, որն առաջնության 21 հանդիպումներում ընդամենը 10 գոլ խփեց: Համեմատության համար նշենք, որ նախորդ առաջնության լավագույն ռմբարկու Մորի Կոնեի հաշվին 23 գոլ էր գրանցվել: Նրա ցուցանիշը լավագույնն է վերջին 14 առաջնություններում:
Իսկ ահա Օտուբանջոյի արդյունավետությունն ամենացածրն է ՀՀ առաջնությունների լավագույն ռմբարկուների ցանկում: Մինչ այդ ամենացածր ցուցանիշը գրանցվել էր 2016/17թթ. (Միհրան Մանասյան, Արտակ Եդիգարյան) և 2017/18թթ. (Արտակ Եդիգարյան) առաջնություններում՝ 13-ական գոլ:
Նման ցածր արդյունավետության հիմնական պատճառն առաջին հերթին պայմանավորված է ֆուտբոլիստի խաղային որակներով: Դրա հետ մեկտեղ պետք է հաշվի առնել նաև առաջնության հանդիպումներում թիմերի միջև ծավալված անհաշտ մրցակցությունը, որի պայմաններում ընդհանուր արդյունավետությունն էլ (2,13 գոլ) ամենացածրն էր ՀՀ առաջնությունների պատմության մեջ: Բացի այդ էլ, ի տարբերություն նախորդ մրցաշրջանների, հայտնի պատճառներով 29-րդ առաջնությունում ֆուտբոլիստներն ավելի քիչ խաղերի մասնակցեցին:
Որ ակումբին հավասարվեց «Ալաշկերտը» չեմպիոնական տիտղոսների քանակով
Եթե հաշվի առնենք միջին արդյունավետությունը, ապա Օտուբանջոյի ցուցանիշը (0,47 գոլ մեկ խաղում) ամենացածրը չէ և չնչին չափով գերազանցում է 2016/17թթ. առաջնությունում Արտակ Եդիգարյանի ցույց տված արդյունքին՝ 0,46 (13 գոլ 28 խաղում):
Վերջին տարիներին առաջնության լավագույն ռմբարկուի տիտղոսի հավակնորդների թիվը շատ սահմանափակ է, պայքարն էլ առանձնապես թեժ չի ընթացել: Բացառություն չկազմեց նաև ավարտված առաջնությունը:
Առաջնության մեկնարկում արդյունավետությամբ աչքի ընկավ «Լոռիից» «Ուրարտու» տեղափոխված Ջոնել Դեսիրեն, որը 17 գնդակով ճանաչվել էր 2018/19թթ. մրցաշրջանի լավագույն ռմբարկու: Մեկնարկային 7 հանդիպումներում նույնքան գոլ խփելով (մեկը՝ «Գանձասար-Կապանի» հետ հետագայում չեղարկված խաղում), Դեսիրեն այդ արդյունքով ամենաարդյունավետն էր առաջնության աշնանային հատվածում:
5-ական գնդակով ռմբարկուների պայքարում նրան հետապնդում էին արարատցի Ուրոշ Նենադովիչն ու ալաշկերտցի Դավիդ Դավիդյանը, 4-ական գոլ էին խփել Մաիլսոն Լիման («Արարատ-Արմենիա») և «Վանի» հարձակվող Ուիլֆրեդ Կուասի Էզան: Իսկ Յուսուֆ Օտուբանջոն ընդամենը 3 անգամ էր գրավել մրցակիցների դարպասները:
Առաջնության գարնանային հատվածում պատկերը փոխվեց: Ինչպես նախորդ առաջնությունում, այս անգամ էլ գարնանը Դեսիրեի նշանառությունը խախտվեց, որի պատճառով նա իր գոլերի քանակն ավելացրեց ընդամենը մեկով: Բացի այդ էլ, վնասվածքի պատճառով Դեսիրեն բաց թողեց առաջնության ավարտական 5 հանդիպումները:
Իսկ ահա Յուսուֆ Օտուբանջոն կարծես զարթնեց խորը քնից: Նրան առաջնության գարնանային հատվածի մեկնարկում արդյունավետ 4 խաղերի շարք հաջողվեց, որի ընթացքում 5 գոլ խփեց: «Ուրարտուի» հետ հետաձգված խաղում էլ դուբլի հեղինակ դառնալով, Օտուբանջոն 10 գնդակով ամրապնդեց առաջնության լավագույն ռմբարկուների ցանկի առաջատարի իր դիրքը, որը պահպանեց մինչև մրցաշարի ավարտը:
«Ալաշկերտը» VBET Հայաստանի Պրեմիեր լիգայի հաղթողն է. VNews-ի ֆոտոշարքը
Յուսուֆ Օտուբանջոն Հայաստանում ելույթները սկսել է նախորդ առաջնության գարնանային հատվածում: Նրա նորամուտն «Արարատ-Արմենիայի» կազմում շատ տպավորիչ ստացվեց: 2020թ. մարտի 2-ին «Արարատի» հետ կայացած խաղում նիգերիացի ֆուտբոլիստը նորամուտը դուբլով նշեց: Առաջնության 13 հանդիպումներում խփած 7 գոլով Օտուբանջոն 2-րդն էր «Արարատ-Արմենիայի» ռմբարկուների ցանկում՝ ընդամենը մեկ գնդակով զիջելով Մաիլսոն Լիմային:
«Արարատ-Արմենիայի» կազմում Օտուբանջոն արդեն 17 գոլի հեղինակ է դարձել: Թիմում ելույթները շարունակելու դեպքում նիգերիացի հարձակվողը կդառնա «Արարատ-Արմենիայի» բոլոր տարիների լավագույն ռմբարկուն՝ գերազանցելով 19 գոլ խփած Անտոն Կոբյալկոյի ցուցանիշը:
Յուսուֆ Օտուբանջոն դարձավ ՀՀ առաջնությունների լավագույն ռմբարկուի տիտղոսին արժանացած 26-րդ ֆուտբոլիստը: Նա նաև 8-րդ լեգեոնականն է, որ դառնում է «Ոսկե խաղակոշիկի» դափնեկիր:
Առավել հաճախ՝ 3-ական անգամ բոլորից դիպուկ են գտնվել Արսեն Ավետիսյանը, Արա Հակոբյանը, Մարկոս Պիզելին և Միհրան Մանասյանը: Լավագույն ռմբարկուի տիտղոսին արժանացած ամենաերիտասարդ ֆուտբոլիստն Էդգար Մանուչարյանն է, որը 2004թ. 17 տարեկանում 21 գոլով փյունիկցի իր խաղընկերոջ՝ Գալուստ Պետրոսյանի հետ դարձել է ամենաարդյունավետը: Ամենատարեցն Արթուր Քոչարյանն է, որը 35 տարեկանում «Ուլիսում» 15 գնդակով դարձել է 2009թ. առաջնության լավագույն ռմբարկու: Իսկ ՀՀ առաջնությունների արդյունավետության բացարձակ ռեկորդակիրն Արա Հակոբյանն է, որը 2003թ. «Բանանցի» կազմում 45 անգամ խոցել էր մրցակիցների դարպասները:
Օտուբանջոն «Արարատ-Արմենիայի» առաջին ներկայացուցիչն է, որ արժանանում է առաջնության լավագույն ռմբարկուի տիտղոսին: Թիմերից առավել հաճախ՝ 11 անգամ «Ոսկե խաղակոշիկի» դափնեկիր են դարձել «Փյունիկի» ներկայացուցիչները: 6 անգամ լավագույն ռմբարկու են ճանաչվել «Ալաշկերտի», 4-ական՝ «Բանանցի» և «Շիրակի», 3՝ «Արարատի», 2՝ Արարատի «Արաքսի» (նախկին «Ցեմենտի») ֆուտբոլիստները: Մեկական անգամ էլ դափնեկիր են դարձել Արտաշատի «Դվինի», «Կիլիկիայի», «Ուլիսի», «Իմպուլսի», «Լոռիի» և «Արարատ-Արմենիայի» ֆուտբոլիստները:
Հետաքրքիր է, որ միայն 14 անգամ են առաջնության լավագույն ռմբարկու ճանաչվել չեմպիոն հռչակված թիմի ֆուտբոլիստները:
VNews.am-ը ներկայացնում է ՀՀ առաջնությունների լավագույն ռմբարկուների ցուցանիշները:
Թվական | Ռմբարկուն | Ակումբը | Գոլ | Խաղ | Միջինը |
1992 | Վահե Յաղմուրյան | «Արարատ» | 38 | 29 | 1,31 |
1993 | Անդրանիկ Հովսեփյան Գեղամ Հովհաննիսյան | «Բանանց» ՀՄԸՄ | 26 26 | 25 27 | 1,04 0,96 |
1994 | Արսեն Ավետիսյան | ՀՄԸՄ | 39 | 26 | 1,50 |
1995 | Արսեն Ավետիսյան | ՀՄԸՄ | 12 | 10 | 1.20 |
1995/96 | Արա Ադամյան | «Արագած», «Շիրակ» | 28 | 20 | 1,40 |
1996/97 | Արսեն Ավետիսյան | «Փյունիկ» | 24 | 21 | 1,14 |
1997 | Արթուր Պետրոսյան | «Շիրակ» | 18 | 17 | 1,05 |
1998 | Արա Հակոբյան | «Դվին» | 20 | 20 | 1 |
1999 | Շիրակ Սառիկյան | «Ցեմենտ» | 21 | 24 | 0,87 |
2000 | Արա Հակոբյան | «Արաքս» | 21 | 19 | 1,10 |
2001 | Արման Քարամյան | «Փյունիկ» | 21 | 19 | 1,10 |
2002 | Արման Քարամյան | «Փյունիկ» | 36 | 21 | 1,76 |
2003 | Արա Հակոբյան | «Բանանց» | 45 | 24 | 1,87 |
2004 | Էդգար Մանուչարյան Գալուստ Պետրոսյան | «Փյունիկ» «Փյունիկ» | 21 21 | 22 24 | 0,95 0,87 |
2005 | Նշան Էրզրումյան | «Կիլիկիա» | 18 | 23 | 0,78 |
2006 | Արամ Հակոբյան | «Բանանց» | 25 | 27 | 0,92 |
2007 | Մարկոս Պիզելի | «Արարատ» | 22 | 26 | 0,87 |
2008 | Մարկոս Պիզելի | «Արարատ» | 17 | 29 | 0,58 |
2009 | Արթուր Քոչարյան | «Ուլիս» | 15 | 26 | 0,57 |
2010 | Գևորգ Ղազարյան Մարկոս Պիզելի | «Փյունիկ» «Փյունիկ» | 16 16 | 24 26 | 0,66 0,61 |
2011 | Բրունո Կորեա | «Բանանց» | 16 | 26 | 0,61 |
2012/13 | Նորայր Գյոզալյան | «Իմպուլս» | 22 | 41 | 0,53 |
2013/14 | Միհրան Մանասյան | «Ալաշկերտ» | 17 | 28 | 0,60 |
2014/15 | Սեսար Ռոմերո Ժան-Ժակ Բուգուհի | «Փյունիկ» «Շիրակ» | 21 21 | 25 25 | 0,84 0,84 |
2015/16 | Միհրան Մանասյան Հեբեր Արաուխո | «Ալաշկերտ» «Ալաշկերտ» | 16 16 | 22 26 | 0,72 0,61 |
2016/17 | Միհրան Մանասյան Արտակ Եդիգարյան | «Ալաշկերտ» «Ալաշկերտ» | 13 13 | 27 28 | 0,48 0,46 |
2017/18 | Արտակ Եդիգարյան | «Ալաշկերտ» | 13 | 27 | 0,48 |
2018/19 | Ջոնել Դեսիրե | «Լոռի» | 17 | 25 | 0,68 |
2019/20 | Մորի Կոնե | «Շիրակ» | 23 | 28 | 0,82 |
2020/21 | Յուսուֆ Օտուբանջո | «Արարատ-Արմենիա» | 10 | 21 | 0,47 |